بسم الله الرحمن الرحيم
حاسس انك لوحدك في الكون الطويل العريض ده؟!!!
بقالك كتير اوي حاسس بالفشل و عدم الرضا عن قراراتك؟!!!
كتير بتقفل على نفسك باب أوضتك وتقعد تفكر, تفكر تفكر لحد ما تحس ان دماغك هاتنفجر؟!!!
نفسك تسند ايدك على كتف حد وتقوله شكرا انك جنبي ارجوك فكر بدالي انا تعبت من كتر التفكير؟!!!
اذا انت بتحس بأي حاجة من الحاجات اللي فاتت دي فانا هاقولك على حاجة خطيرة جدا........
في هدية ربنا بعتهالك في سنة رسوله صلى الله عليه وسلم
وانت ممكن تكون لسة ما فتحتهاش او مش عارف تستغلها صح
مع انك لو استخدمتها صدقني هاتريح بالك و ربنا هيشرحلك بيها صدرك و هتعمل كل حاجة وانت واثق من النتيجة انها في صالحك من غير ما تقتل نفسك في التفكير
الهدية دي هي
صلاة الأستخارة
صلاة الأستخارة هي انك تعمل توكيل شامل لربنا.......
يارب انا وكلتك انك تعمل اللي فيه الخير ليا
ربنا....... تخيل!
اللي خلقك.. اللي عارف عنك كل حاجة ....
علرف انت بتفكر في ايه .. بتفكر ازاي ..
ايه اللي بيسعدك .. ايه اللي ممكن يضايقك .. عارف فين بدايتك وازاي هتبقى نهايتك
عالم الغيب.. يعني كمان عارف ايه مستقبلك تصور !!!!
وبعد كل ده تستخسرفي نفسك انك تستخيره او تسأله عن حل لمشكلتك؟؟؟ازاي يا عم ؟؟؟!!!!!
بص هاقولك على حاجة ...
مش انت لما يكون عندك مشكله بتروح لحد حكيم بتثق في طريقة تفكيره وتسأله عن رأيه؟
لأ و ساعات بتبقى واثق ان رأيه صح حتى لو كنت مش مقتنع بيه.
يااااااااااااااااه!!!!
سبت أحكم الحاكمين و رحت لعبد مسكين من عباده !!
عارف أروع حاجة في صلاة الأستخارة ايه؟
ان انت لما تيجي تحكي لحد حاجة انت اللي بتديله تفاصيل الموضوع اللي هايبني عليها قراره, و لو نسيت تقوله حاجه,خلاص....... الله أعلم بقى هيبقى رأيه إيه!!!
إنما, الرحمن الرحيم عليم بذات الصدور, مش مستنيك تقوله على حاجه لأنه عارف أصلا إنت عايز تقول إيه من قبل حتى ما تقول,
يعني اللي هيخليك تعمله, هيبقى فعلا الخير ليك.
إزاي بقى تصلي صلاة الإستخاره؟؟؟؟!!!!
كل اللي مفروض تعمله انك تتوضأ فتحسن الوضوء ثم تصلي ركعتين في غير الفريضة, ركعتين عاديين خالص, ثم تقرأ دعاء الإستخاره و هو- ركز فيه لأنه دعاء رائع فعلا-
"اللهم اني أستخيرك بعلمك و أستقدرك بقدرتك, فأنت تعلم وانا لا أعلم وانت تقدر وأنا لا أقدر وأنت علام الغيوب
اللهم ان كان في هذا الأمر ( وتسميه) خير لي في ديني و معاشي و عاقبة امري فاكتبه لي وقربه مني و قربني منه
اللهم ان كان في هذا الأمر (و تسميه) شر لي في ديني و معاشي و عاقبة أمري فاصرفه عنني واصرفني عنه
و قدر لي الخير حيث كان ثم ارضني به يا أرحم الراحمين"
و بعد كده صدقني و عن تجربة شخصية ,هتلاقي النيران اللي في صدرك صارت بردا و سلاما و هتبقى حاسس بجد ان ربنا معاك وجنبك
و لو كان الخير في الحاجة دي هتلاقيها متيسرة جدا و بتتحقق
و اذا كان فيها شر ليك هتلاقي كل الطرق مسدودة و الحاجة دي بتبعد عنك فعلا
المشكله بقى إن في بلادنا معتقدات غريبة جدا عن صلاة الإستخاره
فمثلا, فيه ناس فاكره إن صلاة الإستخاره بتتصلى بس لما يكون فيه عريس متقدم لواحده أو العكس !!!! مش فاهمه إشمعنى؟!
ده الصحابه كانوا بيصلوها حتى علشان يعرفوا إذاكانوا يصلحوا نعل الحذاء أو لأ !
وبعدين أنت المفروض توكل ربنا العليم في كل صغيرة و كبيرة في حياتك؛
و الأغرب من كده كمان
إن الناس فاكره أن أول متصليها لازم تشوف رؤية في منامك, و إذا مشفتش يبقى لم تقبل!!!!!!!!!!!!!!!
لأ طبعا,
لما الرسول - صلى الله عليه وسلم- إتكلم عن الصلاه دي ماذكرش حاجه عن الرؤى ,
و بعدين لو أنت ركزت في الدعاء ده هتلاقيك بتدعي إن ربنا يعملك الخير مش بتدعيه انك تحلم,
و طبعا مش معنى كل الكلام اللي فات ده إنك تصليها و تنام..... خلاص أنا صليت و يا سماء أمطري ذهبا أو فضه!!!!
لأ إنت تصليها و تجري و تكافح و تسأل و تشتغل و... و....و.......و......و...... وتكون في النهايه واثق إن قرارك صح و طريقك هيوصلك للخير